ລິ້ງ ສຳຫລັບເຂົ້າຫາ

ປະຊາຊົນ ພາກັນຫລົບໜີ ຂະນະທີ່ປາກິສຖານ ຍົກເລີກ ການຫ້າມ ອອກນອກເຮືອນ ເປັນການຊົ່ວຄາວ


ປາກິສຖານ: ເຈົ້າໜ້າທີ່ປາກິສຖານ ໄດ້ຍົກ ເລີກ ການຫ້າມ ອອກນອກເຮືອນ ເປັນການ ຊົ່ວຄາວ ໃນເຂດ ຮ່ອມພູ SWAT ທີ່ກຳລັງ ມີການ ສູ້ຣົບກັນ ເພື່ອອຳນວຍ ໃຫ້ປະຊາຊົນ ຫຼາຍໆພັນຄົນ ພາກັນ ຫລົບໜີ ການສູ້ຣົບ ທີ່ນັ້ນ. ກອງທັບ ປາກິສຖານ ໄດ້ຍົກເລີກ ການຫ້າມ ອອກນອກເຮືອນ ທີ່ເມືອງ MINGORA ຊຶ່ງເປັນ ຫົວເມືອງ ສຳຄັນ ໃນເຂດ ຮ່ອມພູ SWAT ແລະ ຫລາຍໆເມືອງ ທີ່ຕັ້ງຢູ່ ໃກ້ຄຽງ ເປັນເວລາ 8 ຊົ່ວໂມງ ໃນ ວັນສຸກ ມື້ນີ້. ປະຊາຊົນຈຳນວນຫລາຍຮ້ອຍ ຄົນ ຊຶ່ງ ສ່ວນໃຫຍ່ແລ້ວ ແມ່ນພາກັນຍ່າງ ໄດ້ເດີນທາງ ອອກຈາກ ເຂດດັ່ງກ່າວ ໄປຍັງ ສູນອົພຍົບ ທີ່ຕັ້ງຂຶ້ນ ຢູ່ທາງທິດໃຕ້. ເຈົ້າໜ້າທີ່ ກ່າວວ່າ ມີຫລາຍກວ່າ 834 ພັນຄົນ ໄດ້ພາກັນ ຫຼົບໜີ ຈາກເຮືອນຊານ ບ້ານຊ່ອງ ຂອງພວກ ເຂົາເຈົ້າ ໃນໄລຍະ ສອງ-ສາມ ອາທິດ ຜ່ານມາ ທ່າມກາງ ທີ່ມີການ ສູ້ຣົບກັນ ຢ່າງດຸເດືອດ ເພີ້ມໃສ່ ຈຳນວນ 5 ແສນຄົນ ທີ່ໄດ້ ພາກັນ ຫລົບໜີ ຄວາມວຸ້ນວາຍ ກ່ອນໜ້ານີ້. ກອງທັບ ປາກິສຖານ ກ່າວ ໃນວັນສຸກ ມື້ນີ້ວ່າ ຕົນໄດ້ສັງຫານ ພວກຫົວຮຸນແຮງ ທາລີບານ 55 ຄົນ ໃນເຂດ ຮ່ອມພູ SWAT ໃນໄລຍະ 24 ຊົ່ວໂມງ ຜ່ານມານີ້. ຄວາມຮຸນແຮງ ໄດ້ຣະເບີດຂຶ້ນ ພ້ອມກັບ ການພັງ ທະລາຍລົງ ຂອງຂໍ້ຕົກລົງ ຢຸດຍິງ ລະຫວ່າງ ຣັຖບານ ແລະ ພວກຫົວຮຸນແຮງ ທາລີບານ ຊຶ່ງເປັນຜູ້ ຄວບຄຸມ ດິນແດນ ສ່ວນໃຫຍ່ ຢູ່ໃນເຂດ ດັ່ງກ່າວ.

ສຣີລັງກາ: ຣັຖບານສຣີລັງກາກ່າວວ່າ ຕົນ ຫວັງວ່າ ຈະເຂົ້າຢຶດ ເອົາດິນແດນ ທັງໝົດ ທີ່ພວກກະບົດ ເສືອທະມິລ ຍັງຄວບຄຸມຢູ່ ພາຍໃນເວລາ 2 ມື້. ໂຄສົກ ຂອງກອງທັບ ສຣີລັງກາ ກ່າວໃນ ມື້ນີ້ວ່າ ທະຫານ ຣັຖບານ ກຳລັງບຸກ ຄືບໜ້າ ໄປຕາມ ແຄມຝັ່ງທະເລ ເຖິງແມ່ນ ນາໆຊາດ ໄດ້ຮຽກຮ້ອງ ໃຫ້ມີການ ຢຸດຍິງ ເພື່ອ ອະນຸຍາດ ໃຫ້ພົລເຮືອນ ຈຳນວນ ຫລາຍໆພັນຄົນ ຫລົບໜີໄປ ກໍຕາມ. ຣັຖບານ ສຣີລັງກາ ບໍ່ຮັບ ພິຈາຣະນາ ການກົດດັນ ຂອງນາໆຊາດ ເພື່ອ ໃຫ້ຢຸດເຊົາ ການບຸກ ໂຈມຕີ. ທັງສອງຝ່າຍ ໃນບັນຫາ ຂັດແຍ້ງ ຕ່າງກໍຖືກ ຕຳໜິ ຕິຕຽນ ຢ່າງໜັກ ທີ່ບໍ່ໄດ້ ໃຫ້ການ ປົກປ້ອງ ຄຸ້ມຄອງ ພົລເຮືອນ ຈຳນວນ ຫລາຍໆພັນຄົນ ທີ່ໄດ້ຕົກຄ້າງ ຢູ່ນຳ ກອງກຳລັງ ຂອງພວກ ກະບົດ ໃນເຂດພື້ນທີ່ ທີ່ນັບມື້ ນັບຫຼຸດນ້ອຍ ຖອຍລົງ ໃນພາກເໜືອ ຂອງ ສຣີລັງກາ ນັ້ນ. ກອງທັບ ສຣີລັງກາ ກ່າວວ່າ ປະຊາຊົນ ອີກ 1 ພັນຄົນ ສາມາດ ຫລົບໜີ ຈາກ ເຂດຄວບຄຸມ ຂອງ ພວກກະບົດ ໃນວັນສຸກ ມື້ນີ້ ເພີ້ມໃສ່ ຈຳນວນ 3 ພັນ 700 ກວ່າຄົນ ທີ່ໄດ້ພາກັນ ຫລົບໜີ ໃນມື້ ວັນພະຫັດ ຜ່ານມາ ໂດຍທາງ ທະເລສາບ ໃກ້ໆແຄມທະເລ.

ນັກຂ່າວອະເມຣິກັນ: ນັກຂ່າວອະເມຣິກັນ ທີ່ ຫາກໍ ຖືກປ່ອຍ ອອກຈາກຄຸກ ເມື່ອໄວໆມານີ້ ໄດ້ເດີນທາງ ອອກຈາກ ປະເທດ ອີຣ່ານແລ້ວ. ນາງ ROXANA SABERI ໄດ້ເດີນທາງ ໄປເຖິງ ປະເທດ ອອສເຕຣັຽ ພ້ອມກັບ ພໍ່ແມ່ ຂອງນາງ ແລະ ໝູ່ຄົນນຶ່ງ ໃນຕອນເຊົ້າ ມື້ນີ້ ໂດຍຖ້ຽວບິນ ຈາກສນາມບິນ ອີໝາມ KHOMEINI ໃນນະຄອນຫລວງ ເຕຫະຣ່ານ. ນາງກ່າວຕໍ່ ພວກນັກຂ່າວ ຢູ່ທີ່ ສນາມບິນ ນະຄອນ VIENNA ວ່າ ນາງມີແຜນການ ທີ່ຈະພັກຜ່ອນ ຫລາຍໆມື້ ທີ່ອອສເຕຣັຽ. ທະນາຍຄວາມ ຂອງນາງ ໃນອີຣ່ານ ກ່າວຕໍ່ ອົງການຂ່າວ ຣອຍເຕີ້ວ່າ ນາງຕັ້ງໃຈ ຈະເດີນທາງ ກັບຄືນ ມາຍັງ ສະຫະຣັດ ຈາກຢູໂຣບ. ນັກຂ່າວ ອະເມຣິກັນ ເຊື້ອສາຍ ອີຣ່ານ ທີ່ຖື ສອງສັນຊາດ ອາຍຸ 32 ປີ ຄົນນີ້ ໄດ້ຖືກຈັບ ໃນເດືອນ ມັງກອນ ຜ່ານມາ ຂະນະທີ່ ພວມຊື້ ເຫລົ້າແວງ ຊຶ່ງເປັນການ ຜິດກົດໝາຍ ໃນອີຣ່ານ. ນາງໄດ້ຖືກ ຕັດສິນໂທດວ່າ ມີຄວາມຜິດ ໃນເດືອນແລ້ວ ຍ້ອນທຳ ການຈາຣະກັມ. ຫຼັງຈາກ ທະນາຍຄວາມ ຂອງນາງ SABERI ໄດ້ຍື່ນຂໍ ອຸທອນ ຕໍ່ຄຳຕັດສິນ ຂອງສານ ຜູ້ພິພາກສາ ກໍໄດ້ ຫລຸດຜ່ອນໂທດ ໃຫ້ນາງ ແລະປ່ອຍນາງ ໃຫ້ເປັນ ອິສຣະ ໃນມື້ວັນຈັນ ຜ່ານມານີ້.

ເກົາຫລີ - ຄວາມເຄັ່ງຕຶງ: ເກົາຫລີເໜືອໄດ້ປະ ກາດ ໃຫ້ທຸກສັນຍາ ທີ່ເຂດອຸສາຫະກັມຮ່ວມ ຊຶ່ງ ໄດ້ຮັບ ທຶນກໍ່ສ້າງ ຈາກ ເກົາຫລີໃຕ້ນັ້ນ ເປັນໂມຄະ. ການປະກາດ ຂອງ ສື່ມວນຊົນ ທາງການ ເກົາຫລີເໜືອ ໃນມື້ນີ້ ເວົ້າວ່າ ເກົາຫລີເໜືອ ຈະອອກ ຣະບຽບການໃໝ່ ສຳລັບ ເຂດອຸສາຫະກັມ KAESONG ຕາມລຳພັງ. ພຽງຢາງ ຮຽກຮ້ອງໃຫ້ ບໍຣິສັດຕ່າງໆ ຂອງ ເກົາຫລີໃຕ້ ທີ່ຕັ້ງຢູ່ ໃນເຂດ ອຸສາຫະກັມ ດັ່ງກ່າວ ຮັບເອົາ ຣະບຽບການໃໝ່ ຫລືບໍ່ ກໍໃຫ້ຍົກຍ້າຍໜີ. ຣັຖບານ ເກົາຫລີໃຕ້ ໄດ້ສະແດງ ຄວາມເສັຽໃຈ ໃນທັນທີ ແລະເວົ້າວ່າ ຕົນຈະບໍ່ ຍອມຮັບເອົາ ການຍົກເລີກ ສັນຍາ ຂອງ ເກົາຫລີເໜືອ. ເຈົ້າໜ້າທີ່ ເກົາຫລີໃຕ້ ຮຽກຮ້ອງ ໃຫ້ເກົາຫລີເໜືອ ເປີດການ ເຈຣະຈາ ຫາຣື ກ່ຽວກັບ ເຣື່ອງນີ້. ໃນເດືອນແລ້ວ ເກົາຫລີເໜືອ ແລະ ເກົາຫລີໃຕ້ ໄດ້ເປີດ ການເຈຣະຈາ ຣະດັບ ຣັຖບານ ກັບຣັຖບານ ເປັນເທື່ອທຳອິດ ໃນຮອບ ນຶ່ງປີກວ່າໆ. ໃນລະຫວ່າງ ການເຈຣະຈານັ້ນ ເກົາຫລີເໜືອ ໄດ້ທວງໃຫ້ ບັນດາ ບໍຣິສັດ ຂອງ ເກົາຫລີໃຕ້ ທີ່ຢູ່ ໃນເຂດ ອຸສາຫະກັມ ດັ່ງກ່າວ ຂຶ້ນເງິນເດືອນ ໃຫ້ແກ່ ພວກຄົນງານ ແລະ ຄ່າທຳນຽມ ທີ່ດິນ.

ມຽນມາ - ສະຫະຣັດ: ທະນາຍຄວາມຂອງ ທ່ານນາງ ອອງຊານ ຊູຈີ ຢືນຢັດວ່າ ທ່ານນາງ ບໍ່ມີຄວາມຜິດ ໃນການ ລະເມີດຕໍ່ ການກັກ ບໍຣິເວນ ທ່ານນາງ ຂະນະທີ່ ເຈົ້າໜ້າທີ່ ຂອງ ຣັຖບານ ທະຫານ ມຽນມາ ພວມກະກຽມ ທີ່ຈະນຳໂຕ ທ່ານນາງ ຂຶ້ນສານ ໃນມື້ວັນຈັນ ຈະມານີ້. ຜູ້ນຳ ປະຊາທິປະໄຕ ອາຍຸ 63 ປີ ຂອງມຽນມາ ໄດ້ຖືກ ກ່າວຫາວ່າ ພົວພັນກັບ ເຫດການ ທີ່ປລາດ ຊຶ່ງມີຄົນ ສັນຊາດ ອະເມຣິກັນ ຜູ້ນຶ່ງ ໄດ້ລອຍນ້ຳ ໄປຫາເຮືອນ ຂອງທ່ານນາງ ທີ່ຕັ້ງຢູ່ ແຄມທະເລສາບ ແລະລັກເຂົ້າໄປ ຫລົບລີ້ ຢູ່ຂ້າງໃນ. ການກ່າວຫາ ທີ່ວ່ານີ້ ມີຂຶ້ນ ຂະນະທີ່ ການກັກ ບໍຣິເວນ ທ່ານນາງ ຮອບລ່າສຸດ ພວມຈະ ໝົດອາຍຸລົງ ໃນທ້າຍ ເດືອນນີ້. ທະນາຍຄວາມ KYI WIN ກ່າວວ່າ ທ່ານນາງ ອອງຊານ ຊູຈີ ບໍ່ໄດ້ເຊີນ ຜູ້ຊາຍຄົນນີ້ ໃຫ້ເຂົ້າໄປ ໃນເຮືອນ ຂອງທ່ານນາງ ແລະດັ່ງນັ້ນ ທ່ານນາງ ຈຶ່ງບໍ່ມີ ຄວາມຜິດ ຍ້ອນວ່າ ນາຍ JOHN WILLIAM YETTAW ຊຶ່ງເປັນຄົນ ສັນຊາດ ອະເມຣິກັນນັ້ນ ເປັນຜູ້ບຸກລຸກ ລ່ວງລ້ຳ. ທະນາຍ ກ່າວຕື່ມວ່າ ທ່ານນາງ ອອງຊານຊູຈີ ບໍ່ໄດ້ລາຍງານ ກ່ຽວກັບ ຜູ້ຊາຍ ຄົນນີ້ ໃຫ້ເຈົ້າໜ້າທີ່ຊາບ ຕາມທີ່ໄດ້ ກຳນົດໄວ້ ໃນກົດໝາຍນັ້ນ ກໍຍ້ອນວ່າ ທ່ານນາງ ບໍ່ຢາກໃຫ້ ມີຜູ້ໃດ ຖືກຈັບ ຍ້ອນທ່ານນາງ.

ໄຂ້ຫວັດໃຫຍ່: ມາເລເຊັຽໃຫ້ການຢືນຢັນ ກ່ຽວ ກັບ ກໍຣະນີທຳອິດ ຂອງເຊື້ອ ໄຂ້ຫວັດໃຫຍ່ H1N1 ກາຍເປັນ ປະເທດ ລ່າສຸດ ທີ່ໄດ້ຮັບ ຜົນກະທົບ ຈາກການ ແຜ່ລະບາດ ຂອງພະຍາດ ທີ່ວ່ານີ້. ຖແລງຂ່າວ ທີ່ນຳອອກ ເຜີຍແຜ່ ໃນມື້ນີ້ ໂດຍກະຊວງ ສາທາ ຣະນະສຸກ ມາເລເຊັຽ ແຈ້ງວ່າ ນັກສຶກສາ ອາຍຸ 21 ປີ ຄົນນຶ່ງ ໄດ້ເຂົ້າຮັບ ການປິ່ນປົວ ພະຍາບານ ໃນມື້ວານນີ້ ຫລັງຈາກ ຮູ້ສຶກເປັນໄຂ້ ເຈັບຄໍ ແລະເຈັບຕົນໂຕ. ຜູ້ກ່ຽວ ຫາກໍ ເດີນທາງ ກັບຄືນມາ ແຕ່ ສະຫະຣັດ ນຶ່ງມື້ ກ່ອນນັ້ນ. ກະຊວງ ສາທາ ຣະນະສຸກ ມາເລເຊັຽ ເວົ້າວ່າ ເວລານີ້ ຄົນເຈັບ ມີອາການ ທຸ່ນທ່ຽງແລ້ວ ຢູ່ທີ່ ໂຮງໝໍຣັດ SELANGORE. ອົງການ ອະນາມັຍໂລກ ປະກາດ ໃນມື້ວານ ນີ້ວ່າ ເກືອບ 6 ພັນ 500 ຄົນ ມີລາຍງານ ວ່າໄດ້ຕິດ ເຊື້ອໄວຣັສ H1N1 ຢູ່ໃນ 33 ປະເທດ. ແບລຢ້ຽມ ແລະ ເປຣູ ໄດ້ລາຍງານ ກ່ຽວກັບ ການຕິດເຊື້ອ ກໍຣະນີທຳອິດ ໃນວັນພະຫັດ ວານນີ້. ແຕ່ອົງການ ອະນາມັຍໂລກ ເວົ້າວ່າ ພະຍາດ ດັ່ງກ່າວ ຍັງບໍ່ທັນ ກາຍເປັນ ພະຍາດຕິດຕໍ່ ຮ້າຍແຮງເທື່ອ. ເຊື້ອໄວຣັສ H1N1 ເຮັດໃຫ້ມີ ຜູ້ເສັຽຊີວິດ ແລ້ວ 66 ຄົນ ຢູ່ໃນທົ່ວໂລກ ຊຶ່ງສ່ວນໃຫຍ່ ຂອງພວກ ທີ່ເສັຽຊີວິດ ແມ່ນຢູ່ ປະເທດ ເມັກຊິໂກ ທີ່ເປັນ ຈຸດສູນກາງໃນ ການແຜ່ຣະບາດ ຂອງພະຍາດນີ້.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.

XS
SM
MD
LG