ລິ້ງ ສຳຫລັບເຂົ້າຫາ

ຜູ້ອຳນວຍການ FBI ກ່າວວ່າ ຈະບໍ່ມີ ການກ່າວຫາ ໃນຄະດີອີແມລ ທ່ານນາງ Clinton


ທ່ານນາງ Hillary Clinton (ຊ້າຍ) ແລະຜູ້ອຳນວຍການ ອົງການ FBI ທ່ານ James Comey (ຂວາ)

ທ່ານນາງ Hillary Clinton (ຊ້າຍ) ແລະຜູ້ອຳນວຍການ ອົງການ FBI ທ່ານ James Comey (ຂວາ)

ອົງການສືບສວນຂອງ​ລັດຖະບານ​ກາງ ຫລື FBI ຂອງ​ສະຫະລັດ ກ່າວ​ວ່າ ຕົນສະ​ເໜີ​ແນະ​ວ່າ ຈະ​ບໍ່​ມີ​ການ​ກ່າວ​ຫາ​ ໃນ​ຄວາມ​ຜິດ​ໃດໆ​ ຕໍ່​ທ່ານນາງ Hillary Clinton ​ໃນ​ຖານ​ນຳ​ໃຊ້​ເຄື່ອງ​ບໍລິການ​ອີ​ແມ​ລຂອງ​ເອກະ​ຊົນ ​ໃນ​ຂະນະ​ທີ່​ທ່ານນາງ​ເປັນ​ລັດຖະມົນຕີ​ການ​ຕ່າງປະ​ເທດ ຊຶ່ງ​ເຮັດ​ໃຫ້ອຸບປະສັກທີ່​ສຳຄັນ ​ໃນດ້ານ​ການ​ເມືອງແລະໃນ​ດ້ານ​ກົດໝາຍສຳລັບ​ຜູ້​ທີ່ ຄາດວ່າ​ຈະ​ໄດ້​ຖືກ​ສະ​ເໜີ​ຊື່​ແຕ່ງຕັ້ງໃຫ້​ເປັນ​ຜູຸ້ສະໝັກ​ປະທານາທິບໍດີ​ຂອງ​ພັກ​ເດ​ໂມ​ແຄຣັດ ໝົດ​ໄປ.

ຜູ້ອຳນວຍການ ​ອົງການ FBI ທ່ານ James Comey ​ໃນ​ວັນ​ອັງ​ຄານ​ວານ​ນີ້​ ໄດ້​ຕ້ອງ​ຕິ​ຢ່າງ​ແຮງຕໍ່ທ່ານ​ນາງ​ Clinton ທີ່​ເປັນ​ຫົວໜ້າ​ນັກ​ການ​ທູດ​ຂອງ​ປະ​ເທດ​ແຕ່​ປີ 2009​ ຫາ 2013​ ​ແລະ​ເພື່ອນ​ຮ່ວມ​ງານ​ຂອງ​ທ່ານ​ນາງຢູ່​ທີ່​ກະຊວງ ການ​ຕ່າງປະ​ເທດໃນ​ອັນ​ທີ່​ທ່ານ​ເອີ້ນວ່າ ການ​ເຮັດ​ວຽກແບ​ບບໍ່​ລະມັດລະວັງ​ທີ່ສຸດກ່ຽວ​ກັບ​ເອກະສານ​ລັບ​ທີ່​ພວ​ກ​ເຂົ້າ​ເຈົ້າ ສົ່ງ​ໃຫ້​ກັນ​ແລະ​ກັນ​ຜ່ານ​ທາງ​ເຄື່ອງ​ບໍລິ​ການ​ອີແມ​ລ​ເອກະ​ຊົນ ທີ່​ທ່ານ​ນາງ​ໄດ້​ຕິດຕັ້ງຢູ່​ທີ່​ບ້ານ​ພັກ​ຂອງ​ທ່ານ​ນາງ​ໃນ​ນະຄອນ​ນິວຢອກ.

ຜູ້ອຳນວຍການ ອົງການ FBI ທ່ານ James Comey ຖະແຫຼງກ່ຽວກັບການສືບສວນ

ແຕ່​ແນວ​ໃດ​ກໍ​ຕາມ ທ່ານ Comey ກ່າວ​ວ່າ ການ​ສືບສວນ​ຂອງ​ອົງການ FBI ​ໃນ​ຂອບ​ເຂດ​ທີ່​ກວ້າງຂວາງ ກ່ຽວ​ກັບ​ອີ​ແມ​ລຫຼາຍ​ພັນ​ສະບັບຂອງ​ທ່ານ​ນາງ Clinton ບໍ່​ໄດ້​ພົບ​ເຫັນ​ຫຼັກ​ຖານ​ໃດ​ທີ່​ວ່າ ທ່ານ​ນາງ “​ຕັ້ງ​ໃຈແລະ​ມີ​ເຈດ​ຕະນາ” ທີ່​ຈະລະ​ເມີດ​ກົດໝາຍຂອງ​ສະຫະລັດ​ແລະ​ບໍ່​ມີ​ເຫດຜົນ​ພຽງພໍ​ທີ່​ໄອ​ຍະ​ການຈະຟ້ອງ​ຮ້ອງ​ດຳ​ເນີນ​ຄະດີ​ຕໍ່​ທ່ານ​ນາງ ອີງ​ຕາມ​ຫລັກ​ຖານ​ທີ່ໄດ້​ຄົ້ນພົບ ​ໃນ​ການ​ສືບສວນ​ເປັນ​ເວລາ​ຫຼາຍໆ​ອາທິດ.

ການ​ສືບສວນ​ຂອງ​ອົງການ FBI ໃນ​ການ​ທີ່​ທ່ານ​ນາງໃຊ້​ເຄື່ອງ​ບໍລິການ​ອີ​ແມ​ລ​ເອກ​ະຊົນ ​ແທນທີ່​ຈະ​ເປັນ​ເຄື່ອງ​ບໍລິການ​ອີແມ​ລຂອງລັດຖະບານ​ທີ່​ມີ​ການ​ຄວບ ຄຸມ​ໃນ​ດ້ານ​ຄວາມ​ປອດ​ໄພ​ຢ່າງ​ເຄັ່ງ​ຄັດ​ນັ້ນ​ໄດ້​ພາ​ໃຫ້​ເຈົ້າໜ້າ​ທີ່​ສືບສວນ​ແລະ​ໄອຍະ​ການສອບ​ປາກຄຳ​ທ່ານ​ນາງ​ເປັນ​ເວລາ 3 ຊົ່ວ​ໂມງ​ເຄິ່ງທີ່​ສຳນັກງານ​ໃຫຍ່​ອົງ​ການ FBI ​ທີ່​ນະຄອນຫຼວງວໍ​ຊິງ​ຕັນ.

ທ່ານນາງ Hillary Clinton ລັດຖະມົນຕີການຕ່າງປະເທດ ໃນເວລານັ້ນ ກວດໂທລະສັບມືຖື ຂອງທ່ານນາງ ຢູ່ເທິງເຮືອບິນຂົນສົ່ງ

ທ່ານນາງ Hillary Clinton ລັດຖະມົນຕີການຕ່າງປະເທດ ໃນເວລານັ້ນ ກວດໂທລະສັບມືຖື ຂອງທ່ານນາງ ຢູ່ເທິງເຮືອບິນຂົນສົ່ງ

ການ​ຖະ​ແຫຼງຂອງ​ທ່ານ Comey ມີ​ຂຶ້ນນຶ່ງ​ອາທິດ​ ຫລັງ​ຈາກ​ໄດ້​ເກີດ​ຂ່າວ​ນອງ​ນັນທາ​ງ ດ້ານ​ການ​ເມືອງ ກ່ຽວ​ກັບ​ການ​ພົບ​ປະ ລະ​ຫວ່າງ​ສາມີ​ຂອງ​ທ່ານ​ນາງ Clinton ຄື​ອະດີດ​ປະທານາທິບໍດີ Bill Clinton ​ແລະ​ຫົວໜ້າ​ເຈົ້າໜ້າ​ທີ່​ປະຕິບັດ​ກົດໝາຍ ລັດຖະມົນຕີ​ກະ ຊວງ​ຍຸຕິ​ທຳ ທ່ານ​ນາງ Loretta Lynch ທີ່​ສະໜາມ​ບິນນະຄອນ Phoenix ​ໃນ​ລັດອາຣິ
ໂຊນາ. ທັງ​ທ່ານ Clinton ​ແລະ​ທ່ານນາງ Lynch ກ່າວ​ວ່າ ພວກ​ທ່ານ​ໄດ້​ລົມ​ກັນ​ເປັນ​ເວ ລາ​ເຄິ່ງຊົ່ວ​ໂມງ​ແຕ່​ບໍ່​ໄດ້​ລົມກັນ​ໃນ​ເລື້ອງອີແມລແຕ່​ຕໍ່​ມາ​ຕ່າງ​ກໍ​ໄດ້​ສະ​ແດງ​ຄວາມ​ເສຍ​ໃຈ​ໃນ​ການ​ກະທຳ​ດັ່ງກ່າວໃນ​ຂະນະ​ທີ່​ທ່ານ​ນາງ Lynch ​ເປັນ​ຜູ້​ກຳກັບ​ນຳ​ການ​ສືບສວນໃນ​ຄະດີນີ້.

ທັງ​ສະມາຊິກ​ຂອງ​ພັກຣີພັບ​ບລີ​ກັນ​ແລະ​ເດ​ໂມ​ແຄຣັດ ຕ່າງ​ກໍ​ໄດ້​ຕຳ​ໜິຕິຕຽນ​ການພົບ​ປະ ​ທີ່​ສະໜາມ​ບິນ​ຂອງ​ທ່ານ​ນາງ​ Lynch ກັບ​ທ່ານ Bill Clinton.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG