ທ່ານ ທຽນ ເຊນ ປະທານາທິບໍດີມຽນມາ ກ່າວວ່າລັດຖະບານຂອງທ່ານ ຈະເປີດໂຮງຮຽນຂຶ້ນຫຼາຍແຫ່ງເພື່ອປັບປຸງການສຶກສາຂອງພວກມຸສລິມໂຣຮິງຢາ ຊຶ່ງເປັນຊົນເຜົ່າກຸ່ມນ້ອຍທີ່ກ່າວຫາມຽນມາຊຶ່ງປະຊາຊົນສ່ວນໃຫຍ່ ເປັນຊາວພຸດນັ້ນວ່າ ປະຫັດປະຫານພວກເຂົາເຈົ້າ.
ໃນການໃຫ້ສໍາພາດພິເສດບັ້ນນຶ່ງກັບຫົວໜ້າວີໂອເອພະແນກພາສາ ມຽນມາ ທ່ານ Than Lwin Htun ນັ້ນ ປະທານາທິບໍດີທຽນ ເຊນ ກ່າວວ່າ ການສຶກສາຖືວ່າເປັນເຄຶ່ອງມືສໍາຄັນຢ່າງນຶ່ງ ເພື່ອຊ່ວຍເຫຼືອປະຊາຄົມຕ່າງໆ ບໍ່ວ່າກຸ່ມໃດກໍຕາມ ໃຫ້ດໍາລົງຊີວິດຢູ່ດ້ວຍຄວາມກົມກຽວກັນ ແລະເຄົາລົບນັບຖືສິດທິມະນຸດ.
ໃນການສໍາພາດດັ່ງກ່າວເມື່ອວັນຈັນຜ່ານມານີ້ທີ່ເມືອງຫຼວງເນ ປິດໍ ປະທານາທິບໍດີມຽນມາ ທ່ານ ທຽນ ເຊນ ກ່າວວ່າ ຊາວເບງກາລີ ທີ່ທ່ານໝາຍເຖິງຊາວໂຣຮິງຍາ ມີແຕ່ໂຮງຮຽນສາສະໜາ ແລະຂາດເຂີນໃນ ສິ່ງທີ່ທ່ານເອີ້ນວ່າ ການສຶກສາທີ່ຖືກຕ້ອງເໝາະສົມ.
ທ່ານ ທຽນ ເຊນ ກ່າວອີກວ່າ ລັດຖະບານຂອງທ່ານ ຈະເປີດໂຮງຮຽນ ໃຫ້ພວກເຂົາເຈົ້າ ກໍຄືຊົນເຜົ່າໂຣຮິງຢາມຸສລິມ ເພື່ອໃຫ້ພວກເຂົາເຈົ້າໄດ້ ຮໍ່າຮຽນໃນລະບົບການສຶກສາສະໄໝໃໝ່ ແລະເມື່ອເວລາພວກເຂົາເຈົ້າໄດ້ ຮັບການສຶກສາດີແລ້ວ ພວກເຂົາເຈົ້າຈະມີແນວຄິດທີ່ດີ ແລະສາມາດຕັດ ສິນໃຈໃນສິ່ງທີ່ເຫັນວ່າຖືກຫຼືຜິດໄດ້.
ແຕ່ໃດມາ ລັດຖະບານມຽນມາປະຕິເສດບໍ່ຍອມຮັບຮູ້ຊາວໂຣຮິງຢາມຸສລິມ ປະມານ 800,000 ຄົນ ວ່າເປັນຊົນເຜົ່າກຸ່ມນຶ່ງ ແລະບໍ່ຍອມໃຫ້ສັນຊາດມຽນມາແກ່ພວກເຂົາເຈົ້າ. ຊາວມຽນມາຫຼາຍຄົນຖືວ່າຊາວໂຣຮິງຢາ ເປັນພວກຊາວຕ່າງດ້າວຜິດກົດໝາຍ ທີ່ມາຈາກປະເທດບັງກລາແດສ.
ໃນການໃຫ້ສໍາພາດເມື່ອວັນຈັນຜ່ານມານັ້ນ ນັບວ່າເປັນການສໍາພາດເທື່ອທໍາອິດ ທີ່ອະນຸຍາດໃຫ້ວີໂອເອ ໂດຍປະມຸກຂອງມຽນມາ. ອະດີດລັດຖະ ບານທະຫານມຽນມາ ຊຶ່ງທ່ານທຽນ ເຊນມີຕໍາແໜ່ງເປັນນາຍົກລັດຖະມົນ ຕີໃນເວລານັ້ນ ໄດ້ສັ່ງຫ້າມວີໂອເອ ແລະກ່າວຫາວ່າວີໂອເອວ່າ ອອກຂ່າວແບບຫຼອກລວງ.